لكن يبقى كل جامعة لها انظمتها في اللبس وبعض الأشياء تعتبر ذوق عام ان الواحد يلبسها أو لا، هذي بعض النصائح الي بتساعد المستجدات في انهم يختارو لبسهم:
١-التزمي بنظام الجامعة: أشياء كتير ممكن تشوفيها مي منطقية أو متخلفه مثلا بعض الجامعات لسا الى اليوم تحدد اللبس تنورة سوداء وقميص أبيض! أو بعضهم يمنعو البناطيل ولازم تنورة واسعه وطويله، فحتى لو كان النظام مو عاجبك مشي والبسي متل مايبغو لأن في الأخر هدفكي هو الشهادة واللبس تقدري تتكشخي في اي مكان تاني، لكن أحيانا بعض الأشياء ماتكون نظام بس الأغلب متعارف عليها مثلا في جامعتي تقريبا الكل يلبس تنوره سوداء مع انه عادي مسموح لبس بقية الألوان هنا لكي الحرية تلبسي مثل الناس أو تغيري بالي تحبي.
٢-في البداية اخذيلك القطعة الأساسية بعدين شويه شويه جربي وشوفي ايش يعجبكي وايش لا، لكن لا تروحي من أول يوم وتاخذي ملابس الترم كله لان ممكن ماتكون مناسبه لبرودة الجامعه أو نظامها أو حتى ممكن تلقي ان نوعية من الملابس ماتريحكي وماتلبسيها كثير عشان كذا بالتدريج أخذي الي تحتاجيه.
من القطع الأساسيه الي على الأغلب بتحتاجيها في الجامعه:
بلوزه رسميه بيضاء (ممكن تختاريها بيسك أو بخامات مختلفه شويه زي الشيفون المهم في الأخير تكون رسميه تقدري تلبسيها لما يكون عندك تقديم عرض أو بتمثلي الجامعة أو النادي)
بنطلون أو تنوره سوداء رسميه
شنطه حجمها مناسب لأغراضك ممكن تكون ظهر أو كتف
شوز مريح للمشي
تيشيرت أبيض ممكن تلبسيه لوحده أو تحت الجكيتات
اذا تبردي بسرعه اخدي كاردقان او جاكيت خفيف لان أغلب الجامعات قاعاتها والمكتبه تكون بارده
نظاره شمسيه خصوصا اذا في مسافه بين مباني الجامعه
٣-بعدي عن الملابس الي عليها عبارات سيئة أو الي تكون ترمز لفريق أو شيء محدد لانها راح تعطي انطباع سيء عنك فالأفضل تتركيها للبيت أو خرجاتك مع صاحباتك
٤- لايكون تركيزك على اللبس أغلب الجامعات كبيرة وفيها أشكال وألوان الناس ومن طبقات مختلفه كل احد يلبس الي يحب والغالب مشغول بنفسه حتى لو تكرري اللبس اسبوع كامل ما بينتبهو فالبسي عشان نفسك واختاري الأشياء الي تخليكي مبسوطه وتفتح نفسك للدوام، ولما يكون عندك برزنتيشن البسي شيء مرتب أول شيء لنفسك عشان تقدمي وانتي واثقه من نفسك وكمان لان بعض الدكتورات يحطو درجات عليه، طبعا مرتب يعني مثلا بلوزه رسميه وتنوره سوداء مايحتاج تحوسي أو تبالغي هو بس عشان يعودو البنات على انو يكون شكلهم لايق ويدل انهم متعلمين وفاهمين لان الناس تحكم على الشكل ومانقدر ننكر هذا الموضوع حتى لو كلنا عارفين انه خطأ 💔
٥- كثير من طالبات الجامعات طوال الوقت تجلس بالعبايه وبعض الجامعات تحاول تمنعها لكن الموضوع صاير جدا طبيعي خصوصا إذا ماتبغي تفكري ايش تلبسي بس تاخذي شنطتكي وتمشي.
تي شيرتات
أقمصه
لوفرات/ اسبدرلز
وهذي بعض التنسيقات ممكن تفيدكم تاخذوا أفكار منها
ليست هناك تعليقات:
إرسال تعليق