YesStyle هو موقع آسيوي فيه مجموعة كبيرة من المنتجات والماركات الآسيوية ومنتجاته تشمل الفاشن والعناية بالبشرة والميك اب وأشياء المنزل والتنظيم
أفضل شيء فيه وهو الي يميزه عن معظم مواقع الملابس الصينية انو منتجاته معظمها مي تقليد، بالعكس هي منتجات من ماركات آسيوية بعضها معروفه مثل توني مولي وكليك وبعضها مو مره معروفه بالنسبة لبقية العالم.
بالنسبة لجودة ملابسه تتفاوت على حسب الماركة و دولة الصناعة وأفضل شيء من ناحية الجودة هي الماركات الكورية أما الصينية بعضها كويسه وبعضها لا واذا تبغوا تعرفوا اقروا معلومات القماش بتلقوه مكتوب بالنسبة لكل قطعه وشوفوا الصور مع انو احيانا التصوير يخدع لكن انتم أكثر شيء ركزوا على القماش نفسه والخياطه اذا هي مشدودة ومتساوية أولا.
*في قسمين مخصصه للملابس الكورية واليابانية فقط تقدرو تدخلولهم من هنا
بالنسبة للدفع و الشحن:
الموقع يحتاج فيزا عشان تدفعوا وأفضل كمان لو يكون عندكم باي بال لانه أأمن بكثير من الدفع بالفيزا مباشرة
كمان بالنسبة للشحن الموقع يشحن للسعودية وجربته مره وحده (شحن سريع) وعلى كذا كانت مدة الشحن تقريبا شهر وتاخر اسبوع زياده لكن في الأخير وصل بس عموما أفضل أشحن على بريد أمريكي لانه أسرع وأضمن
الموقع يطولوا إلى مايجهزوا القطع ويشحنوها معضم القطع تاخذ اسبوعين الى ماتنشحن وبعدها كمان نحسب مدة الشحن زيادة
لكن في بعض القطع تنشحن خلال 24ساعة تلقوها من هنا
بالنسبة للمقاسات بعد ماتدخلو على القطعة الي تبغوها انزلو تحت عشان تطلع لكم معلومات المقاس وبتلقوها مكتوبة بالسنتيمتر أو تقدروا تضغطو على size chart وبيطلع لكم جدول فيه التحويل بين المقاسات
ودائما اعتمدوا على المقاسات المكتوبة بالسنتيمتر ولو كانت القطعه one size
جدول القياسات "size chart":
والحين نجي لطريقة استخدام الموقع:
أول شيء تحتاجوه هو انكم تسووا اكاونت
مرروا السهم على sign in وبتطلعلكم قائمة اضغطوا register now
بعدها عبوا بياناتكم، الاسم المستعار مو ضروري لكن فائدته انه يطلع بدال اسمك الحقيقي لما تكتبي ريفيوز، وفي الموقع كل ماكتبتي ريفيو يعطوكي نقاط ولما تجمعيهم يصر لكي تخفيض (طبعا ماتقدروا تكتبوا ريفيوا الا على المنتجات الي اشتريتوها من قبل)
بعدها نجي لاضافة عنوان البريد (لو كنتوا مضيفين العنوان في الباي بال تقدروا تتعدوا هذي الفقرة)
وعشان تدخلو عليه مرروا السهم فوق "Hello, ......" بتطلع لكم قائمة اضغطوا منها على My Account
هذي الصفحة تقدروا تعدلوا منها بياناتكم أو تشوفوا الأشياء الي طلبتوها قبل لكن الي يهمنا الحين هو اضافة عنوان البريد من "Address Book"
هذي الصفحة أتوقع بتكون مختلفه شويه عندكم لانكم لسا ما أضفتوا ولاعنوان وعشان تضيفوا عناوان جديد اضغطوا "Add New Address"
ادخلوا بيانات البريد ولو كنتوا بتشحنوا للسعودية ضروري تحطوا رقم هاتف\جوال تستخدموه لانهم راح يتصلوا عليكم لما توصل الشحنة عشان ياخذوا العنوان
بالنسبة لاسم العنوان يقصدوا فيه اسم يوصف العنوان عشان لو كان عندك أكثر من عنوان تفرقي بينهم وماراح يأثر شيء هو بس لكم
بعدها نبدأ التسوق اختاروا الأشياء الي تبغوها وأضيفوها للسلة
لما تنتهوا من التسوق اضغطوا على Shopping bag
بتطلع لكم الأشياء الي اخترتوها وكمياتها وتقدروا تلغوا أي شيء منها ولو كان كل شيء تمام نروح للدفع بالباي بال
بيطلب منكم تدخلوا الايميل والباسورد الي سجلتوا بها في الموقع مره ثانيه للتأكيد
بعدها بتجيكم صفحة تسجيل الدخول للباي بال وبعد ماتسجلوا الدخول بتطلعلكم هذي الصفحة وتقدروا تشوفوا منها السعر بالريال والأشياء الي اخترتوها وطريقة الشحن(سريع أو عادي) بعدها تضغطوا على continue
بيرجعنا للموقع نفسه ولو كان عنوان البريد الي بتشحنوا له مختلف عن الي في الباي بال اضغطو على Edit
واختاروا العنوان الي تبغوا تشحنوا له وطريقة الشحن (سريع أو عادي) وآخر شيء اضغطوا على Continue
ميزات الموقع:
1- يوفر منتجات كثيره جدا ومتنوعه.
2- منتجاته معظمها مي تقليد.
3- يحطوا صور كثييير لكل قطعه وأسلوب التصوير كانه بلوق فيعطيكي فكره عن شكلها في اللبس.
عيوبه:
1- مدة الشحن مره طويله.
2- كثير من القطع ون سايز ومقاساتها ماتناسب الكل.
3- الجوده متفاوته من ماركة للثانيه.
هذي طريقة الطلب من الموقع إن شاء الله تكونوا استفدتوا ولو في أي سؤال اكتبوه هنا أو في الانستقرام أو تويتر (@dolce_vie)
الموقع هذا من سنتين تقريباً أعرفه بس للآن ماقد طلبت منه
ردحذفاللي يحمس أكثر التصوير روووعه و فعلاً كأنه تصوير بلوق و يحمس للشراء <3