هدا هو أكتر بوست ترددت في اني أكتبه لاني عارفة انو في كتير مايتقبلو موضوع عمليات التجميل
بأكتب لكم عن تجربتي في عملية تجميل الأنف الي قبل ما أسويها كتير خوفوني وعارضو الفكره مع اني كنت مره محتاجه لاني أسويها بالذات وانو الكسر كان وأنا صغيره وتعرفو كيف البنات في المدارس يدورو أي شيء في الوحده عشان يعيبوا عليها وطبعا كان أول شيء يلقوه هو خشمي فكبرت وأنا متعقدة منه وأكره أشوف وجهي في المرايا بسببه كنت حتى ما أرضى انو أي أحد يصورني لانو الصور دائما تكون بالجنب ويصير واضح فيها 😖
لكن كنت مره خايفة من فكرة العملية إلى ماقربت أخلص الثانوي وقتها الي تشجعت وخلاص قررت اني بأسويها بس ماكنت عارفة كيف أجيب الموضوع لأهلي وتوقعت يعارضو وماتعجبهم الفكرة لانو كل أحد كلمته قالي مجنونة الحين ماتنجح العملية وتتشوهين ولابعضهم جلسو يقولو حرام ومايصلح واني ماخذه الكسر عذر!!!
في الأخير قلت مني خسرانه شيء أجرب حظي وكلمتهم انصدمت انو أبويا على طول وافق من دون مايناقش ولا شيء وأنا الي كنت متخيله ألف سيناريو وشايله هم الموضوع ، أما أمي جلست خايفة حتى بعد أشهر من العملية وهي كل ماصار شيء تنفجع وتقول شكلو بسبب العملية😹😹
وقتها بديت أدور عن أفضل الدكاترة، حددت مجموعة في الرياض وجدة وبديت أدور عنهم في النت وأسأل الي أعرفهم (طبعا انصدمت بانو في كتييييير من الي أعرفهم مسويين عمليات تجميل من قبل وأنا ماكنت ملاحظة)
في الأخير بقي بس خمسة دكاترة ترددت بينهم فبديت أروح لهم وأشوف كل دكتور ايش يقول
أول دكتور كان جمال جمعة وفي أول موعد رحت له قابلت الدكتور وجلس يسألني عن ايش مشكلتي وايش الي أبغاه لكن ماكان عندي فكرة عن ايش أبغى بالضبط كل الي كان في بالي هو اني أبغى العظمه الزايده تروح فقال ليا رأيه وايش يشوف انو يحتاج أسوي.
بعدها بكم يوم رجعت وشفت الصور (مع دكتور ثاني من نفس العيادة) وتأكد من انو كل شيء عاجبني، بعد كذا كان من المفترض اني أحدد موعد العملية عشان خلاص أسويها لكن كنت لسا مترددة بالذات اني مارحت لأي دكتورغيره وما أعرف أي شيء في موضوع العمليات فرحت لدكتورين تانيين ووقتها تأكدت اني خلاص أبغى أسويها عنده وكمان عرفت كم وحده مسوين عمليات عنده من قبل فتطمنت وقررت اني أسويها.
رجعت للعيادة وحددنا وقت العملية والمستشفى الي بأسويها فيه وشفت الصور مره تانية مع الدكتور نفسه وخلاص حددت كل شيء أبغاه وكان أهم شيء عندي انو مايغير شكل الخشم كتير عن شكله الأصلي (العملية مع تكاليف غرفة المستشفى والتحاليل كانت ب24 ألف)
قبل العملية جالي تبلد مو طبيعي أعرف الناس تخاف وتتوتر قبل العمليات أنا ماكنت شايله هم الا ايش ممكن أخربط لما أصحى من التخدير لانو العملية كانت بتخدير كامل لكن أشوا خلوني في غرفة الإفاقة من التخدير وبس في الممرضات والدكاترة إلى ماصحيت تماما بعدها ودوني الغرفة وعدا اليوم الأول بسرعة لاني من الأساس كنت نصه مخدره والنص التاني نايمه بس في الليل هو الي خلاص صحصحت ومره استغربت انو مافي أي ألم ولا احتجت مسكنات بس حلقي هو الي كان يعورني شويه بسبب الانبوب الي كانو حاطينه وقت العملية.
بعد العملية كانو حاطين جبيرة على الخشم من برا وفتايل من جوته وشاش عشان الدم الي ينزل يتغير كل كم ساعة (التنفس أول الأيام يكون من الفم)
اليوم الثاني طلعو الفتايل وكان مرررره يعورر هو أكتر شيء عورني في موضوع العملية كلها وأعطوني اسم بخاخ آخده من الصيدلية عشان أنظف الدم ومايتجمع جوا أنفي.
في الأيام الأولة بعد العملية كنت آكل أشياء خفيفة وسهلة في الأكل لانو حلقي كان لسا يعورني من الانبوب وبالنسبة للنوم كان المفترض اني أنام وظهري مرتفع عشان مايتورم وجهي وتزيد الكدمات لكن أبدا ماقدرت أنام كدا فطنشت الموضوع وصرت أنام على جنبي (ترا مره خطأ بالذات للي تتقلب كتير لانها ممكن تخبط خشمها بالخطأ وهي نايمه لكن وقتها ومع التعب كان كل همي هو اني أنام)
التورم كان كل يوم يزيد إلى اليوم الرابع صار تحت عيني شويه بنفسجي لكن ماكان شيء ملاحظ أما خدي هو المشكلة صار مره متورم ومنتفخ بشكل مضحك بعدها بدأ يخف التورم واختفا تماما بعد اسبوع من العملية.
في اليوم الـ11 رجعت وفكو الغرز والجبيرة كنت متخيلة انو فك الغرز بيكون مره يألم لكن بالعكس كان بس شوية وخز (أخف بكثيييير من ألم لما طلعوا الفتايل)
وأعطوني مرايه أشوف شكله أول شيء خطر في بالي لما شفت خشمي هو مايكل جاكسون كان خشمي مره متجمد كأنو شيء بلاستيكي والارنبه مرتفعه زيادة عن اللازم لكن كنت عارفة من قبل انو لازم ماتحكمي عليه أول ماتفكي الجبيرة لانه بيكون شكله سيء والنتيجة النهائية ماراح تبان إلا بعد ستة شهور إلى سنة فطنشت الموضوع وما اهتميت كتير واليوم التاني تورم الخشم وصارت الأرنبة متكورة شويه وجلست تقريبا أسبوع إلى ما بدأ يوضح شكل الأنف القريب من النهائي ، بعدها صار يتغير شوييه في الخشم كل فترة ونزلت الأرنبه صار شكلها طبيعي أكتر بس ترى التغيرات كانت مره بسيطة ومايلاحظها أحد غيري أو الي يدققو بزيادة
بعد العملية باسبوعين صرت أقدر أخرج وأقابل الناس ورجعت لحياتي الطبيعية صح انو كان في أشياء كتير لازم أتجنبها مثل الحمام المغربي والساونا وبعض الرياضات مثل نط الحبل لكن بشكل عام ماكان شيء متعب أو مأثر على حياتي.
*طبعا كوني سويت العملية عند دكتور مايعني أي شيء هو بس انو أنا ارتحت له وسويتها عنده وكتبت اسمه لانو أكتر شيء انسأل عنه هو عند مين سويتها ولايمكن في دكاترة أفضل منه بكتير وأنا ماأعرفهم عشان كدا لاتعتمدو على كلامي وتقولو خلاص حتى احنا بنسوييها عنده وبتنجح لا اسألو وشوفو بنفسكم أول ولاتنسو الاستخارة قبل كل شيء.
في الأخير دي هي صورة أنفي قبل العملية وبعد سنة منها
طبعا اني كنت متضايقة من خشمي قبل أبدا مايعني انو كل بنت عندها نفس شكل خشمي مشوهة ولازم تعدله بالعكس مره شفت بنت كان شكل أنفها مثلي قبل العملية (حتى الأرنبة عندها كانت نازلة أكتر مني) لكنها كانت مره جذابه وأنفها متناسق مع بقية وجهها على عكس لو عدلته بتطلع عادية ومافيها أي شيء مميز أو جذاب وأكيد في بنات كثير زيها.
*نصيحة اختارو دكتور ممتاز لانو تسوية العملية في المره الاولى أسهل بكثير من التعديل و لما تختاري الدكتور شوفي صور من عمليات سابقة له مع انو معظم الدكاترة مايرضو يورو عشانا يحافظو على خصوصية الناس لكن دوري في النت أو اسألي الناس الي جايين العيادة وإلا مابتلقي أحد مسوي عنده ونصيحة لما تسألي وحده وضحي لها انك تبغي تسوي العملية أول شيء عشان ماتتضايق وغير كذا عشان تقولك اذا في شيء تحتاجي تنتبهيله (زي مره سألت وحده كانت مسوية عملية وماشاء الله خشمها طالع بيرفكت ومو واضح انها مسوية شيء لكن بالعكس نصحتني اني ما أسوي عند الدكتور لانو المستشفى الي هوا فيه عنايتهم جدا سيئة وصارت لها مشاكل كثير بعد العملية بسبب كذا)
*ادا كنتي تبغي تسويها بس تجميل ومافي سبب حقيقي فنصيحة لا تسويها لانو مستحيييييل تقتنعي بشكلك بعد العملية وبتجلسي بس تحوسي وتغيري وكل يوم عمليه إلى مايتشوه شكلك هدا غير عن اننا كلنا عارفين حكم تغيير خلقة ربي.
-بعض الدكاترة ينصحو بانو الواحد ياخد فيتامين سي لشهر قبل العملية عشان ماتطلع كدمات وهذا هو الي سويته والحمدلله بس طلعت لي كدمات خفيفة ليومين واختفت.
*موقع www.realself.com فيه دكاترة كثير عالميين متخصصين في تجميل الانف ويردو على استفسارات الناس فممكن تشوفي كلامهم لو ماقدرتي تتواصلي مع دكتورك أو تبغي تتأكدي زيادة من شيء.
شكرا لك اختي على مشاركتنا التجربة
ردحذفمشاركتك لتجربتك شجاعة منك , حبيت اللي كتبتيه و اللي قال الكسر عذر عشان تسويها بالله ايش يبغى ذا :p !
ردحذفالبوست بيفيد اللي ناوي يسويها و حاب يعرف تفاصيلها , شكراً لك يا جميلة
شكرا لكلامك الحلو
حذفبعض الناس الله يهديهم ماتعرفين كيف يفكرو
ممكن تقوليلي ايمتا بينت النتيجة النهائية لانفك لاني صراحة ساويت العملية من شهرين ولهلئ بحس انو منفوخ بئا ممكن تفيديني
ردحذفلا عادي ماعليكي لاتستعجلي أنا تقريبا أخد معايا تلات أو أربع شهور مع المساج إلى ما اختفى التورم
حذفبس التزمي بطريقة المساج الي أعطاكي اياها دكتورك واذا كان ماأداكي اسأليه لانه يخلي التورم يخف بشكل أسرع
ماشاء الله النتيجه حلوه و واضح إنك بس تبغي تعدلي عيب معين مو دلع أو خربطة ثاني شي عجبني إنك بحثتي كويس ومعلوماتك ممتازه و مابخلتي فيها علينا شكراً لك <3
ردحذفانا انفي طويل بزياده ونازل حححيل والكل يعلق عليه اهلي وبالدوام واي مكان اروحه
ردحذفومحتاره اي دكتور اسويها عنده لاني خايفه اندم
٢ من العيله سووها عند فواز بيدس ولما دخلت النت لقيت كثير شكاوي وخفت
يشنو تنصحيني ؟!
حقيقة ما أعرف أحد سوا عند دكتور فواز لكن لو تعرفي دكاتره (مو شرط دكاترة تجميل ) جربي تسأليهم لأنهم يعرفوا بعض اكتر
حذفولو منتي مرتاحه للدكتور في غيره دكاتره كثير ممتازين منتي مضطرة تسويها عنده
انا سويت عمليتي من شهر ونص والحين خشمي صار مناخر هل هي فتره وتعدي ولا خلاص هذا الشمل اللي بيعتمده خشمي :(
ردحذفماشاء الله جميل انفك جدا وكويس انك عزمتي وسؤيتي العمليه وﻻتفكري بكﻻم الناس اللي يعارضوا على العمليه . نفسك نفس معانات ناس تقرب لي . الله يعينهم .
ردحذفأختي أنا سويت عند جمال جمعة من ١٢ يوم كذا وانفي نفسك عندي عظمة فقط قلت له يشيلها ما ابغى شي ثاني بس احسه نفس مايكل جاكسون زي ما قلتي هل فعلا رح يخف وتنزل الارنبة حالتي النفسية سيئة
ردحذفيا ليت توضحي لي متى يتعدل وتنزل الارنبة
أول شيء مبروك والحمد لله على سلامتك وبالعكس ماعليكي لا تزعلي نفسك إن شاء الله أكيد بتنزل
حذفحقيقة المده تختلف من أحد للتاني وحتى الدكتور نفسه ماراح يقدر يقولك وقت محدد، بالنسبه ليا والله ما أتذكر كم بالضبط أخذت إلى ما نزلت لاني من زمان سويتها لكن الي اتذكره انه في البدايه كانت الأرنبه مره مرتفعه ومشدوده حتى ان الفتحات باينه لكن بعد تقريبا شهر أو شهر وشويه نزلت وصار شكله معقول (لكن كان لسا متورم شويه وأخذ مده إلى ماراح تماما)
الله يسلمك يا رب ويسعدك و يطمن قلبك ردك ريحيني
ردحذفألف شكر 🌷🌷
عندي نفس المشكلة ولكن الفرق اني ولد ف لذلك خايف اسويها ويقولون عني الناس خكري ومدري ايش وبرضو غالية العملية واهلي مستحيل يوافقون خصوصا اني ولد :(
ردحذفنفس حالتي ومضايقني كثير، انت على الاقل خشمك كان اصلا مشكلته هي بروز العظمة بس لكن انا فيه سمنه شوي المهم انا نفسي اسوي العملية بس اهلي ماهم في ذاك الغنى وانا ولد بعد وتوني فالعمر 15 وصاير م افكر الا فيه لدرجة بعض الاحيان احلم به هه بصيييح اهلي مستحيل يوافقون T.T
ردحذفيسعدك يارب ايش اسم عيادته لان خشمي مكسور حيل ومايل ومتفشله منه مررره
ردحذففيه احد سوا عند دكتور ممدوح عشي يمدحونه انا بسوي بعد اسبوعين وخاايفه��
ردحذفمرحبا الى جميع الأطباء المتواجدين بهذا المنتدى
ردحذفانا عمري 27 سنه كنت اعاني من انسداد بالأنف وصعوبه بالتنفس فظهر عندي اعوجاج بالحاجز الأنفي وإنحناء بالعظمه الخارجيه للأنف فعملت عمليتين بنفس اليوم والوقت
1- عمليه تعديل الحاجز الأنفي و اللحميه
الحمد لله بعد العمليه تنفس طبيعي وفرق كبير والحمد لله
2- تجميل للأنف وتصغيره وتغير الدائره الأرنبيه
قام الطبيب بتكسير بجهة اليمنى للأنف بتكسير العظام ونحف الأنف لأن العظمة كانت عريضه لدي ثم انزل الأنف بخط مستقيم و صغر الغضروف طبعا انا صارلي شهرين واسبوعين عامله العمليه
الأن سؤالي:
مكان ما كسر الطبيب بالجهه اليمنى ملاحظه في بروز بسيط تحت الجلد وهو عباره عن عظمه منتفخه فسألت الطبيب الإستشاري التجميل رد قائلا هذا بعد التكسير للعظم وعندما يلتئم العظم يكون تكلس بالعظم وتاخد فتره ليخف بس المشكله انو الإنتفاخ عباره عن عظمه طيب هل كلام الطبيب صحيح هل ستختفي لأنو قال العظم لما جاء يلتئم تكلس وراح ينحته الجسم بعد فتره
لكن يوجد طبيب اخصائي انف شافني وقال لا هذي عظمه وراح تبقى هكذا
انا الأن خايفه لأن الإنتفاخ محل التكسير شوي باينه فهل حتبقى طول العمر هيك وهل هذا خطأ من طبيب التجميل ارجو الرد على استفساري ارجوووكم
انا نفسك والله العظيم توي مصلحتها من شهر ونفس اللي عندك بروز مكان العظم اللي تكسر بس قالي ان الانسجه منتفخه وراح يخف
حذفانتي اللحين صارلك سنتين تكفين طمنيني راحت ولا باقي
انا خشمي نفس خشمك بس الارنبه نازله اكثر و معقدنييييييييييي اللللللفففففففف، اهلي مستحيل يطيعون و ماعرف شسوي بحياتي، محور حياتي كلها خشمي تعبت ابا اغيره، قوليلي كيف اقنعهم انه في حالتي حلال مب حرام، لانه هذا اسميه تشوه مب طبيعي اعيش حياتي و خشمي بهالشكل
ردحذفالسلام عليكم انه اريد اسوي عمليه تجميل الانف ومتخوفه اريد دكتور شاطر شنو رأيكم منو اضبط حسين حامدي وله فرشته عصمتي المجربين افيدوني يرحمكم الله
ردحذفسعيد جداً بالمقال الجميل دا
ردحذفVery happy with this beautiful article
seo
SEO Course
SEO Internship