من أجمل الأشياء الي وفرتها لنا التكنولوجيا هو الاونلاين شوبنق خصوصا وانو كتير من الأشياء نشوفها ونبغاها لكن ماتكون متوفرة عندنا في السعودية أو تكون أسعارها أعلى بكتير من سعرها الأساسي.
موقع ماك هو أكتر موقع أحب أطلب منه لانهم يجهزو الطلب ويشحنوه بسرعة بالكثير 10 أيام وطلباتي عندي, غير عن انو كل شيء متوفر في الموقع وأسعاره أقل بكثير من فروعنا .
تغليفهم ممتاز ودائما يوصلني الميك اب كاني ماخدتو من الفرع لانهم يغلفوه بشكل كويس فما يتأثر بالشحن .
والأوراج دائما توصل ممتازة حتى في الصيف لانو مدة الشحن قصيرة ومخازن شركات الشحن معظمها مكيفة.
والأوراج دائما توصل ممتازة حتى في الصيف لانو مدة الشحن قصيرة ومخازن شركات الشحن معظمها مكيفة.
طريقة الدفع: موقعهم يقبل الدفع بالباي بال أو الفيزا.
طريقة الشحن: الشحن يكون لعنوان بريد أمريكي مثل شوب أند شيب وورلد شيب.
ملاحظة: في بعض الأحيان تصير مشاكل في الطلب للكولكشنز الجديدة وتوصل الأغراض ناقصة أو أحيانا يقسموها على شحنتين فأفضل انكم تطلبوها من نوردستروم إلا لو كنتو مستعجلين.
تشويز هو موقع يوفر خيارات متنوعة جدا واون ترند من الملابس والشوزات والاكسسوارات للنساء وجودتها مره رووعه.
لكن عيبهم هو مدة الشحن , أتذكر مره كنت مختارة شحن سريع لعنوان بريد أمريكي, كتبو انو الطلب بيوصلني في أقل من 10 أيام لكن انتهت العشرة أيام وماوصلني شيء فرجعت راسلتهم وقالو انو التأخير بسبب انو الأشياء الي اخترتها عليها طلب كبير وماوصلتني أغراضي إلا بعد شهر, ودائما زي كدا تتأخر الطلبات بسبب أو من دون فكرهته وما أتوقع اني بأرجع أطلب منه الا لو كانت القطعة مره عاجبتني ومني مستعجلة عليها.
طريقة الدفع: عن طريق الباي بال أو الفيزا.
طريقة الشحن: يشحنو لمعظم الدول بمافيها السعودية <<لكن إذا كان الشحن لأمريكا يتأخر كذا أجل كيف للسعودية!!
طريقة الشحن: يشحنو لمعظم الدول بمافيها السعودية <<لكن إذا كان الشحن لأمريكا يتأخر كذا أجل كيف للسعودية!!
موقع نوردستروم تتوفر فيه معظم الهاي اند براندز (مثل ديور و مايكل كورس وفيليب ليم) للميك اب والبيوتي والملابس للنساء والرجال والأطفال.
أكتر شيء أحبه في الموقع هو قسم البيوتي والميك اب، فيه تقريبا كل الماركات الهاي اند وبعض المتوسطة مثل ماك وتوب شوب والحلو كمان انو الكولكشنز الجديدة على طول تنزل فيه.
طريقة الدفع: عن طريق الباي بال أو الفيزا.
طريقة الشحن: يشحنو لعناوين البريد الأمريكية، ويشحنو للسعودية بالتعاون مع بورديرفري.
ملاحظة: بورديرفري هي شركة تقدم خدمة الشحن الدولي للمواقع ويكون تتبع الشحنات عن طريقهم، تجربتي معاهم أبدا ماكانت ممتازة وصلتني أغراض غير الي طلبتها مع انو الفاتورة والبوكس مسجل عليها طلباتي الأساسية!! وقتها كنت مشغولة وماكانت الأغراض مهمة فماراسلتهم لكنهم في العادة يرجعو يبدلو الطلب لما تصيير مشكلة زي كذا.
وعني صرت دائما أشحن على الوورلد شيب لانه أسهل وأسرع.
موقع اسوس فيه خيارات كتير من الملابس والاكسسوارات والميك اب.
الموقع يعرض أشياء اسوس بالاضافة لأشياء من ماركات مختلفة مثل مانجو و ريفر آيلاند و وود وود ووايلدفوكس.
أما قسم الميك اب فيضم مجموعة براندز منها ذا بالم وتووفيسد وستيلا.
طريقة الدفع: عن طريق الباي بال أو الفيزا.
طريقة الشحن: يشحنو لمعظم الدول.
ملاحظة: إذا بتشحنو للسعودية فأفضل انكم تختارو الشحن السريع عشان تضمنو انو الشحنة ماتضيع أو تخرب.
يس ستايل هو موقع آسيوي للملابس والاكسسوارات والميك اب والبيوتي واللايف ستايل <<تقريبا فيه كل شيء وأي وحده تحب الآسيوين أكييد راح تحبه
جودة ملابسه متوسطة وبعضها أقمشتها تتنتش بسرعة مو زي الي في الصور عشان كدا لازم تقرئو نوعية القماش وماتعتمدو على الصور.
أشياء اللايف ستايل مره كيوووت للغرفة والمكتب أو حتى المطبخ والتواليت وبعضها أفكارها غريبة ومميزة نصيحة طلو عليها
طريقة الدفع: عن طريق الباي بال أو الفيزا.
طريقة الشحن: يشحنو لمعظم الدول.
ملاحظة: إذا بتشحنو للسعودية فأفضل انكم تختارو الشحن السريع عشان تضمنو انو الشحنة ماتضيع أو تخرب.
هدي هي أكتر المواقع الي أحبها وكتير أطلب منها بالاضافة لأمازون الي فضلت اني ما أذكره معاهم لانوالكلام عنه مستحيل ينتهي بالذات وانه يعتمد على التاجر وتختلف طرق الشحن والدفع والمصداقية من تاجر لتاجر.
في الأخير قد جربتو موقع من هذي المواقع وايش رأيكم فيه؟ وإذا عندكم أي اقتراحات لمواقع حلوه أكتبوها لنا هنا أو في تويتر أو الانستقرام.
ليست هناك تعليقات:
إرسال تعليق