التسوق عبر الانترنت
راح أبدأ في سلسة عن التسوق عبر الانترنت ومجموعة من النصائح لتسوق أفضل وبعض المواقع الي جربتها.
الجزء الأول: ضروريات التسوق عبر الانترنت
بأبدأ هدي السلسلة بأهم الأشياء والي ضروي تكون عندك عشان تقدري تشتري عبر الانترنت.
فيزا للتسوق:
الفيزا جدا ضروريه عشان تقدري تدفعي للمواقع الأجنبية وممكن تاخديها من أي بنك تحبين وعني أفضل انها تكون مسبقة الدفع عشان حتى لو صار خطأ أو كان الموقع
احتيالي ما يقدرو ياخدو غير الموجود في البطاقة.
احتيالي ما يقدرو ياخدو غير الموجود في البطاقة.
من البنوك الي عندها فيزا مسبقة الدفع بنك الأهلي وبنك الراجحي وطبعا لازم يكون عندك حساب في البنك عشان تقدري تطلعيها وتحتاجي تاخدي معاكي بطاقة الأحوال وجواز السفر (جواز السفر مو ضروري لكن أحسن تاخديه لانو بعض الموظفات يطلبوه عشان يتأكدو من السبلنق للاسم) إجراءاتهم مره بسيطة ماأخدت مني أكتر من ربع ساعة وبعدها بكم يوم رسلو الفيزا للبيت مع فيديكس.
حساب في الباي بال (اختياري):
يستخدم كوسيلة للدفع يصير وقت الشراء تدخلي حسابك في الباي بال (الإيميل والباسورد) وهو يسحب من الفيزا ويحولها للموقع ,مو شيء أساسي انو يكون عندك حساب فيه لكن أحسن لانه آمن في الدفع وحتى لو صارت مشكلة مع أي موقع تقدري تشتكي خلال 40 يوم ويرجعو الفلوس أو يحلو المشكلة, سبب ثاني يخليني أفضل الباي بال انو معظم المواقع الي تتعامل معاه تكون مضمونة عكس المواقع الي ماتتعامل غير بالفيزا.
عنوان بريد:
بالنسبة للمواقع الي تشحن للسعودية معظمها بس تطلب الرمز البريدي (postal code) وتشحن مع أرامكس أو فيديكس ,تقدري تعرفي الرمز البريدي من هنا تحددين موقع بيتك على الخريطة وبعد كدا تضغطين على زر الاستعلام عن العنوان البريدي (المحدد بالأحمر) وتحددين منطقة بيتك بمربع عشان تطلع البيانات (لو ضغطتي ضغطة وحدة ماراح يطلع شيء لازم تحددين)
في مواقع كمان تشحن على البريد السعودي لكن ما أفضلها لانو كتير تضيع شحنات مع البريد السعودي, وبالنسبة للمواقع الي ماتشحن للسعودية يحتاج تسجلي في خدمات شحن تعطيكي عنوان في أمريكا وغيرها من الدول, زي خدمة شوب آند شيب أو ورلد شيب (التسجيل فيهم أونلاين بس تعبين بياناتك من الموقع وتسددين الرسوم) في مجموعة فروق بينهم أهمها انو شوب آند شيب ماعندهم تجميع شحنات يعني لو مثلا طلبتي من ثلاث مواقع راح تحتاجين تدفعين حق ثلاث شحنات أما وورلد شيب عندهم تجميع فيعتبروها شحنة واحده وماتدفعين غير مره وحده, فرق تاني انو شوب آند شيب يعطي عناوين بريد في 10 دول مختلفة أما وورلد شيب بس عنوان واحد في أمريكا وفي كمان شركات غيرهم لكن برأيي هدولي افضل ثنتين (في مواضيع كثير في النت تقارن بين شركات الشحن وممكن تساعد في اختيار انسب شركة)
ومن الأشياء الإضافية الي الي تحتاجيها هو اللغة الانجليزية طبعا مو ضروري تكوني تعرفين كل شيء ومره فاهمه لكن تحتاجي شوية لغة عشان تفهمي المكتوب في المواقع وما تختاري شيء خطأ.
وآخر شيء هو معرفة بطريقة تحويل العملات لانو معظم المواقع تستخدم الدولار, في طرق كثير منها انك تعرفي سعر صرف الدولار وتضربيه في السعر أو عن طريق جوجل بانك تكتبي المبلغ واختصار العملة بعدها to واختصار العملة الي تبغي تحولي لها (SAR هو اختصار الريال) مثلا:
لكن مشكلة هدي الطريقة انها تحسب السعر الأساسي من غير العمولة حقت البنك (كل البنوك تاخد كم هللة زيادة على التحويل ولو كان المبلغ كبير راح تفرق) بعض البنوك يكون موجود في موقعهم أداة لتحويل العملات .
هدي هي أهم الأشياء والي راح تحتاجيها للتسوق اونلاين إدا عندكم أي سؤال أو إضافة تقدرو تكتبوه ليا هنا أو على تويتر ❤ ❤ ❤
ليست هناك تعليقات:
إرسال تعليق