من المنتجات الجديدة الي أصدروها ماك لهذه الفترة هو جل الحواجب المضاد للماء.
ماك وصفو المنتج بانه يعطي الحواجب شكل طبيعي ويثبتها من غير مايكون ثقيل بالإضافة لانه ضد الماء ويبقى ثابت على الحواجب لمدة طويلة.
وطبعا بعد ماقريت وصفه ماقدرت أتحمل ما آخد لي واحد وأشوف هل هو من جد مثل مايقولو عنه أو لا, ولانه كان لسا مانزل عندنا في السعودية طلبته من موقعهم عشان أجربه وأقولكم رأيي فيه (إلى آخر مره رحت أشوف كان لسا مانزل
).
ماك نزلو ستة ألوان من جل الحواجب مناسبه لمعظم ألوان الشعر, اللون اللي اخترته هو bold brunette والي هو ثاني أغمق درجة لانو أحلى يكون لون الحواجب أفتح بشويه من لون الشعر.
الجل جاي على شكل ماسكرا و الحلو فيها هو انو فرشته صغيره ومناسبه لرسم الحواجب.
استخدمت طبقة وحدة منه أعطاني شكل طبيعي مره لكن المشكلة كانت في طرف الحاجب صار مو مرتب فاحتجت اني آخد فرشة تانيه وأرسمه بها, جربت أحط طبقتين من الجل لكن ماعجبني شكله صارت شعرات الحاجب مره ثقيله فصرت اكتفي بطبقة وحده.
عشان أشوف إدا كان من جد ضد الماء أو لا حطيت من جل الحواجب على يدي وجربت أشيله بالمويا مع فرك خفيف وتقدرو تشوفو كيف خف لونه شويه لكن لسا باقي ثابت, ويعتبر شيء مره حلو انه لسا ثابت كدا خصوصا وانو في العادة ماراح يصير أي شيء بهذه القوة للحواجب عشان يخليه يروح.
عيوبه:
أول ماحطيته حسيت حواجبي ثقيلين وكان مزعج شويه, لكن ماكان مزعج للحد الي يخليني ما أبغى أستخدمه وخصوصا واني مع الوقت تعودت عليه.
رأيي فيه بشكل عام: أقدر أقول انه أكثر منتج للحواجب عجبني إلى اليوم خصوصا واني أحب شكل الحواجب الطبيعي وهدا هو الي يسوييه لانه يلون شعرات الحاجب نفسها بدل من الجلد, ومره حبيت أنه يطول على الحواجب بقي ثابت عليا تقريبا ل7 ساعات غير عن انه راح يكون جدا مناسب لوقت السباحة وللصيف عموما.
تقييمي له 9/10.
ليست هناك تعليقات:
إرسال تعليق