السلام عليكم...
ايش أخباركم؟ ايش مسويين؟
الأسبوع الماضي كانت تخفيضات بودي شوب وباث آند بودي ووركس فقلت فرصة أروح آخد لي كم شيء, معظم الأشياء الي أخدتها كانت جديدة عليا وأبغى أجربها.
Bath & Body Works
أول شيء أخدته هو زبدة الجسم Midnight Pomegranate
هذي هي أول مرة أجرب زبدة جسم من باث آند بودي, وكانطباع أول مره عاجبني ترطيبها ,تقيله شويه لكن مو للدرجة الي تخلي توزيعها صعب أو تخليها تدبق.
سعرها: 65 ريال ومع التخفيض 35ريال
Deep Cleansing Hand Soap
ما أدري ليش لكن ريحة التفاح تحسسني بالنظافة ودائما أحبها في الصوابين عشان كدا أخدته, وشيء أحبه في صابون باث آند بودي هو انهم ماينشفوا اليد ويعدموها.
سعره الأصلي 35 ريال ومع التخفيض 25 ريال
Lavender Chamomile Lotion
كريم الجسم هدا يستخدم قبل النوم ومن المفترض انه يساعد على الاسترخاء والنوم بسهولة وكثير في النت يمدحوه فصار عندي فضول أجربه وأشوف إدا الكلام من جد أو لا, جربته مرتين ريحته مو مرا عاجبتني ممكن أرجع وأجرب الي بالفانيليا, وبالنسبة للاسترخاء أبدا ما أثر شيء.
السعر:45 ريال
Ohau coconut sunset instant hair highlights
أخدت بخاخ الشعر هدا , هو عبارة عن هايلايت مؤقت يروح مع الغسيل, سويت مثل ماهو مكتوب على العلبة بخيت منه وانتظرت دقيقتين عشان يجف, لونه مرا واضح على الشعر وثابت مابقع إلا بعد ما مسكته وجلست ألعب فيه.
حبيت فكرته وطريقة استخدامه (أحسن بكثير من الطباشير) لكن لونه مو مره حلو جاي على ذهبي مع شوية جلترز فصرت استخدمه لأطراف الشعر من تحت (زي الأومبري).
بـ70 ريال ومع التخفيض صار 50 ريال
The Body Shop
مجموعة زبدة الجسم بالفواكه
حبيت أغير شويه من زبدة الشيا والكاكاو خصوصا واني مليت من ريحتهم فأخدت مجموعة زبدات الجسم بالفواكه, كانو أفضل بكير من الي توقعته صح مايوصلو لدرجة ترطيب زبدة الشيا لكن مو مهم بما اننا في الصيف ومايحتاج ترطيب كتير زي الشتاء, أكثر وحده عجبتني منهم هي زبدة الفراولة أفكر أرجع أشتري المقاس الكبير منها.
مو فاكرة كم كان سعر المجموعة بس أتوقع 60 ريال أو قريب منها.
الي في اليمين كريم للرجلين يستخدم مرتين في الأسبوع وقت النوم لسا ماجربته لكن ريحة النعناع فيه مره قوية لدرجة مزعجة شوية.
الي في اليسار مقشر للرجلين بالنعناع يصير استخدمه قبل الكريم.
السكراب ب39 ريال أما الكريم ما أتذكر بكم بس أتوقع نفس السعر تقريبا.
Vitamin C Skin Boost
سيروم فيتامين سي ما أدري بس قبل كنت متأكدة من انه سائل وقوامه زي الزيت عشان كذا مرا استغربت لما جربته, طلع شويه كريمي زي البرايمر والظاهر كمان انو فيه سيليكون.
أفكر استخدمه كبرايمر منها تستفيد بشرتي وفي نفس الوقت يحسن من شكل الميك آب مني متأكدة إدا بيزبط أو لا لكن بأجرب وأقولكم إدا عجبني.
السعر:84 ريال
Brazil Nut Define & No Frizz
كريم للشعر عشان ماينفش وفي نفس الوقت واقي من الحرارة, مناسب للي شعرها ينفش مع الصيف والرطوبة يستخدم والشعر رطب أو جاف, عني أفضل أستخدمه وهو رطب أسهل بكثير.
سعره 49 ريال.
honey bronze
وآخر شيء أخدته هو هدا البرونزر الجميل الي أعتبره أفضل برونزر بأقل من 100, الحلو فيه انو مطفي ولونه أبدا مو برتقالي فينفع للكونتور أو للوك برونزي.
بـ 69 ريال.
ليست هناك تعليقات:
إرسال تعليق